• Panel 00.jpg
  • Panel 00a.jpg
  • Panel 00b.jpg
  • Panel 00c.jpg
  • Panel 00D.jpg
  • Panel 01.jpg
  • Panel 01a.jpg
  • Panel 01aa.jpg
  • Panel 01b.jpg
  • Panel 02.jpg
  • Panel 02a.jpg
  • Panel 03.jpg
  • Untitled-1.jpg

Sal my kinders steeds kan floreer al is ons geskei?

Gepubliseer deur Susan Eksteen | 28 April 2014

Die ou waarhede bly steeds waar, soos om na jou kind te luister en kwalteit tyd saam met hulle deur te bring.  Weet ook dat jou kinders deur ‘n pynvolle, stressvolle tyd gaan en maak tyd vir hulle.  Praat weer van voor af met jou kinders in elke nuwe ontwikkelingsfase en -stadium van hul lewe.  In elke ontwikkelingsfase is dit nodig om sommige van die dinge wat gebeur het verwerk en om daaroor te praat, om dit te prosesseer, sin daaruit te maak, en te verstaan. 

Om tyd te maak vir jou kind in die gejaagde lewe van vandag is moeilik.  Probeer om nie te veel aktiwitieite aan te pak nie, anders sal jy nie die energie hê om tyd saam met jou kinders prioriteit te maak nie.  Twintig tot dertig minute per dag se ononderbroke aandag aan jou kind/ers sal vir hom/haar die boodskap gee dat hy/sy vir jou belangrik is, dat hy/sy betekenis het vir jou as sy ouer en dat ma/pa graag saam met my wil wees; dat ek belangrik is en raakgesien word.  Weet wat jou kind geliefd laat voel en sorg dat jy iets daarvan elke dag vir en met jou kind/ers doen. 

Vrae wat na egskeiding moontlik deur jou kind se gedagtes kan gaan is: “Waar gaan ons bly?”, “Gaan ons genoeg geld hê?”, “Wat gaan van my word as pa/ma siek word?”, “Sal ek nog universiteit of college toe kan gaan?”, “Wat as ons trek?”  Die lys gaan aan en aan.  Om hulle te help om oor hierdie en ander vrae duidelikheid te kry is dit vir jou as ouer nodig om hulle bekommernisse en vrese met erns te bejeën en daarna te luister. 

Moenie oor jou kinders se gevoelens oordeel of dit afmaak asof dit niks is om oor bekommerd te wees nie.  Hulle voel moontlik onveilig as gevolg van die veranderde omstandighede en as ouer behoort jy hierdie gevoelens raak te sien, en as jy kan, ‘n oplossing daarvoor bied.  Jy kan byvoorbeeld sê: “Ons moet let op hoeveel geld ons spandeer en nie onnodige goed koop nie, maar ons sal met die geld uitkom”.

As die kinders nie by jou as ouer bly nie, is daar baie geleentheid en redes om geleidelik al minder kontak met die kinders te hê.  Jou gewese man/vrou kan dit dalk vir jou moeilik maak om die kinders te sien, of jy kan met iemand anders in verhouding wees en julle spandeer meer tyd met sy/haar familie en kinders; of, jy kan voel dat jou kinders kant gekies het teen jou en eerder by jou gewese man/vrou wil wees.  As ‘n ouer het jy ‘n morele verpligting om in kontak met jou kinders te bly.

Sorg dat jy as ouer aandag gee aan die klein dingetjies wat belangrik is.  Deesdae is dit maklik om daagliks in kontak te bly deur bv. facebook, sms’e en e-pos.  Laat weet jou kinders elke dag dat jy aan hulle dink en dat jy vir hulle omgee en wens hulle ‘n lekker dag toe.  Jy en die kinders kan ook saam kerk toe gaan of op uitsappies gaan.  Raak betrokke by die kind se skool.  Dit is moeilik vir werkende ouers, maar daar’s baie naweek aktiwiteite by ‘n skool waar jy jou hulp kan aanbied. Maak seker jy maak die beste gebruik van jou beskikbare tyd saam met die kinders.  Wees daar vir hulle en daag op ten spyte van dit wat in jou pad staan of hoe moeilik jou gewese man/vrou dit vir jou ookal maak.  Wys jou kind jy stel belan in dit wat vir hom/haar belangrik is.

Laastens, vertrou jouself, en vertrou God en wees verseker daarvan dat jy die beste ouer vir jou kind is.  Glo in jouself en dat jy‘n liefdevolle, meelewende ouer is en kan wees, en dat jy jou kinders kan bystaan en lei deur hierdie moeilike tyd van hartseer en pyn waardeur julle as gesin gaan tydens die egskeiding.  Weet ook dat jy die beste persoon is wat jou kind/ers kan bystaan om ‘n gesonde en blink toekoms te hê.

 

ouer happy couple

jumping couple

pret couple